No sector da hostalería fan balance despois dos días intensos do Entroido. Na provincia de Ourense aseguran que non pode ser mellor. Hoteis e restaurantes colgaron o cartel de completo durante todas os días de festa, mesmo dende semanas antes de que empezara. Din que é un dos mellores entroidos que recordan e que a afluencia vai en aumento cada ano.

Imaxes coma esta repetíronse durante días por toda a provincia de Ourense durante o Entroido. Rúas ateigadas de xente, hoteis cheos, restaurantes sen unha mesa libre e milleiros de visitantes. Dende semanas antes de que comezara a festa os teléfonos non deixaron de sonar para facer reservas.

Notouse, e moito nos bares e restaurantes, e tamén nos hoteis. Coidan que as campañas de promoción do Entroido fixeron efecto e que a festa ten cada vez máis tirón dentro e fóra de Galicia. En localidades como Xinzo da Limia os hosteleiros din que este foi o mellor Entroido dos últimos anos. Unha percepción que se espalla por toda a provincia. Días de troula e festa nos que colgaron o cartel de completo.