Máis de 360 quilos de pólvora iluminaron Compostela na súa noite grande, acompañados dunha proxección que homenaxeaba as mulleres galegas. Este ano, a catedral compatiu protagonismo co Pazo de Raxoi, debido ás obras na basílica. Cun orzamento de máis de 250.000 euros, houbo momentos dramáticos, moita emoción e referencias á nosa cultura que incluíron a actuación de Cantigas e Agarimos. Unhas sete mil persoas viron os fogos do Apóstolo dende a cidade vella compostelá.

E despois da traca final, veu a festa por toda a cidade, nesta meta do Camiño de Santiago onde se mesturan os que viven aquí cos que veñen de fóra e cos que volven polo Apóstolo á casa.

A longa noite rematou con fileiras para coller un taxi, retiradas complicadas e festeiros que se negaban a volver á casa. A catedral, impasible, seguía aí.