CRTVG

Buscar

Os EUA confirman a seguridade de Pfizer e a vacinación agárdase en días no país

Publicado o 08/12/2020 18:45
Os EUA confirman a seguridade de Pfizer e a vacinación agárdase en días no país

A Axencia de Alimentos e Medicamentos dos EUA (FDA, en inglés) confirmou este martes a seguridade e eficacia da vacina da covid−19 de Pfizer e BioNTech nunha primeira análise previa á súa autorización, co que apuntou que podería comezarse a vacinación no país os próximos días.

Na súa análise, a FDA sinalou que a vacina, a primeira considerada para distribución nos EUA, cumpría "cos criterios de éxito prescritos" nun estudo clínico. O informe sinala que a vacina, que necesita dúas doses, garante "a redución de risco de covid−19 confirmado polo menos sete días despois da dose 2" e "unha redución do risco de covid−19 confirmado grave en calquera momento tras a dose 1".

O índice de eficacia é do 95 % en xeral e do 94 % entre maiores de 65 anos (poboación de risco) e por tanto é moi superior ao 50 % que esixe a FDA para aprobar candidatas a vacinas contra a covid−19. Este xoves, un organismo independente científico revisará estes resultados, e, de concordaren cos da FDA, abriríase a posibilidade de comezar a distribución esta fin de semana.

Os cálculos das autoridades estadounidenses apuntan a que antes de fin de ano poderían vacinarse 20 millóns de persoas no país. O Reino Unido comezou este martes a fornecer as primeiras doses da vacina de Pfizer e BioNTech para a inmunización da poboación.

A vacina de Oxford é eficaz e segura, segundo resultados contrastados

A vacina contra a covid−19 sintomática desenvolvida pola universidade inglesa de Oxford coa farmacéutica AstraZeneca ten uns niveis de seguridade aceptables e é eficaz, segundo os resultados preliminares da Fase 3 das probas clínicas publicados este martes na revista The Lancet.

Os expertos de Oxford publicaron hoxe, por primeira vez, as conclusións das súas probas clínicas, que lanzaron unha ausencia de hospitalizacións ou de "enfermidade severa" nos individuos do grupo vacinados. O equipo de Oxford, liderado por Andrew Pollard e Sarah Gilbert, constatou que a súa vacina, administrada en dúas doses (preparatoria e de reforzo), é efectiva nunha media do 70 %, aínda que a variación na cantidade de cada dose incide no resultado. Así, cando se administra media dose seguida dunha dose completa, o nivel de eficacia da vacina ascende ao 90 %, e descende ao 62 % cando os voluntarios reciben dúas doses enteiras do preparado.

Entre as 23.745 persoas inmunizadas, só tres nun período medio de 3,4 meses experimentaron "efectos adversos serios" que poderían ser atribuídos á vacina, aínda que todos se recuperaron ou están a recuperarse e seguen participando nas probas clínicas, explicaron os expertos de Oxford nun comunicado. "En próximas análises, coa inclusión de máis datos a medida que estean dispoñibles, investigaremos diferenzas en subgrupos clave —como os adultos maiores—, diversas etnias, doses, tempos de administración de vacinas de reforzo, e así determinaremos que respostas inmunes ofrecen protección ante infeccións ou enfermidades", precisou Merryn Voysey, un dos autores do estudo.

Noticias web

08/12/2020