Os Estados Unidos admitiron este venres cometer un "tráxico erro" ao lanzar en Cabul (Afganistán) un ataque con drons no que morreron dez civís, sete deles menores, o día 29 de agosto. Asegurouno o xefe do Comando Central (CENTCOM) norteamericano, o xeneral Kenneth F. McKenzie, en declaracións por videoconferencia nunha rolda de prensa no Pentágono.

O secretario de Defensa estadounidense, Lloyd Austin, pola súa banda, explicou nun comunicado que Mckenzie o informara esta mañá de que o ataque pretendía dirixirse contra unha ameaza "inminente" para o aeroporto internacional Hamid Karzai de Cabul, pero resultou ser un erro e provocou a morte dos civís.

O dron atacou un vehículo no que as forzas estadounidenses pensaban que había militantes do grupo terrorista Estado Islámico cando en realidade o conducía Zemari Ahmadi, un traballador dunha ONG estadounidense.