Os Estados Unidos e O Brasil encabezan as cifras de mortes e contaxios en todo o continente, pero practicamente ningún país se libra de comprobar cada día como as mortes e os novos casos se incrementan sen ver aínda próximo o momento en que a curva comece a descender.

Logo de que o Brasil alcanzase os 50.000 falecidos, as miradas seguen pendentes dos países máis poboados do continente, onde non parece ter freo o aumento dos contaxios.

Os EUA andan polos 120.000 mortos con COVID-19 e os contaxios seguen subindo

Os Estados Unidos alcanzaron este domingo as cifras de 2.278.373 casos confirmados de COVID-19 e de 119.959 falecidos coa enfermidade, de acordo co reconto independente da Universidade Johns Hopkins.

Este balance, á 20:00 hora local (00:00 GMT do luns), é de 27.000 contaxios máis que o sábado e de 304 novas mortes.

Tras dous días consecutivos con máis de 30.000 novos casos diarios, a cifra reduciuse lixeiramente o domingo.

A repunta de contaxios en estados como California (con 4.515 máis) A Florida (4.049 máis), Texas (4.430 máis) ou Arizona (3.109 máis) volveu disparar o cómputo global.

México supera os 180.000 casos e 21.000 decesos

A pandemia de COVID-19 superou os 180.000 casos e os 21.000 mortos confirmados este domingo en México ao se sumaren 5.343 novos contagios e 1.044 mortos.

No informe diario, a Secretaría de Saúde (SSa) reportou un acumulado de 185.545 casos e de 21.825 mortos ao concluír a terceira semana do plan da "nova normalidade" con que o Goberno iniciou a reactivación económica o 1 de xuño.

Os datos deste domingo achéganse aos récords diarios de rexistro de contaxios, de 5.662 casos o xoves pasado e de 1.092 falecidos o 3 de xuño.

Así mesmo, a SSa rexistrou 56.590 casos sospeitosos que aínda están pendentes dunha proba confirmatoria e 24.225 activos que presentan síntomas nas últimas dúas semanas.

Con estas cifras, México sobe ao décimo cuarto lugar mundial con máis casos de COVID-19, ao superar a Paquistán, e afiánzase como o sétimo con máis mortes, segundo a Universidade Johns Hopkins.

A Arxentina pasa os mil falecidos e chega a 42.785 contaxios

A Arxentina superou este domingo os 1.000 falecidos por coronavirus desde o comezo da pandemia, xa que alcanzou os 1.011 decesos ao producírense 19 mortes nas últimas 24 horas, informaron fontes oficiais.

O Ministerio de Saúde arxentino indicou no seu informe vespertino diario que durante a xornada se rexistraron1.581 novos casos de COVID-19 no país austral e, por tanto, o total de contaxios chegou a 42.785.

O foco de contaxios continúa situado na área Metropolitana de Bos Aires (AMBA), formada pola capital e polo seu amplo cordón urbano, de onde procederon a maioría dos novos casos e falecementos: 746 dos enfermos novos diagnosticados corresponden á provincia de Bos Aires, que chegou aos 19.329 casos, e 707 á capital do país, que xa contabiliza 19.007 positivos.

Este país cumpre tres meses desde que iniciou a súa corentena obrigatoria, que segue vixente na  AMBA e noutros puntos críticos do seu territorio ata o 28 de xuño, aínda que o Goberno do presidente Alberto Fernández traballa para estendela en vista de que aínda se espera alcanzar o pico de contaxios.

Colombia supera por primeira vez o centenar de mortos diarios

Colombia superou este domingo por primeira vez o centenar de mortos nun só día polo coronavirus, segundo o Ministerio de Saúde, que informou do falecemento de 111 persoas e de 3.019 novos contaxios.

A maior parte das vítimas mortais contáronse nas catro rexións do país con máis contaxios: 44 no departamento do Atlántico (21 en Barranquilla, a súa capital), 19 en Bogotá, 14 no Val do  Cauca e nove en Bolívar.

En total, o país acumula 2.237 falecidos pola COVID-19, o cal representa o 3,25 % do total de contaxiados.

Os falecidos por COVID-19 superan os 8.000 no Perú

Os falecidos como consecuencia da COVID-19 no Perú chegaron este domingo a 8.045, 184 nas últimas 24 horas, un día antes de que se permita a reapertura dos centros comerciais e conglomerados nas cidades do país.

De acordo ao informe diario do ministerio de Saúde, o número de casos no Perú elevouse a 254.936, con 3.598 contaxios máis que o sábado. É a cidade de Lima a máis afectada pola pandemia, con 144.623 enfermos.

No día 98 da emerxencia sanitaria no país, o Executivo sostén que a pandemia está nun lento decrecemento e que é o momento de reabrir progresivamente a economía. Por esa razón, a partir deste luns renovaranse unha serie de actividades produtivas e comerciais, a pesar de que a corentena segue vixente ata o 30 de xuño.