Os contaxios seguen aumentando en España e xa superan os 1.500 casos
O Ministerio de Sanidade notificou un novo aumento dos contaxios de coronavirus nas últimas 24 horas, ata os 1.525 casos (296 máis que os rexistrados o xoves), elevándose a cifra total de infectados a 285.522 e a de mortos a 28.445, con 12 falecidos no últimos sete días.
Segundo os datos de Sanidade, Aragón, con 511 novos positivos; Madrid, con 372; o País Vasco, con 158, e Andalucía, con 107, son as comunidades que acumulan o 75% dos casos activos, mentres que en Cataluña, onde nas últimas xornadas se superaban os 100 contaxios diarios, onte notificouse un descenso das infeccións a 64.
Por terceira xornada consecutiva, os novos contagios superan o milleiro, tras os 1.153 rexistrados o mércores e os 1.229 do xoves.
Nestas últimas 24 horas, por baixo do centenar de novos positivos están as comunidades de Navarra, con 48; Castela e León e a Comunidade Valenciana, con 42; Castela-A Mancha e Galicia, con 33; Baleares, Estremadura e Murcia, con 22; Asturias, con 21; Cantabria, con 14; Canarias, con 6; A Rioxa, con 5; e Melilla, con 3.
En canto aos falecementos, do total de 28.445, (dous máis que as confirmadas por Sanidade ata onte, xoves), 12 delEs tiveron lugar nos últimos 7 días; 4 en Cataluña, 3 na Comunidade Valenciana, 2 en Madrid e en Castela e León, e 1 en Estremadura.
Ata a data, 126.880 enfermos de covid precisaron ingreso hospitalario e 472 foi atendidos en centros sanitarios na última semana.
Un total de 27 contaxiados necesitaron coidados intensivos nestes últimos sete días (11.777 desde o inicio da pandemia).
Situación do coronavirus en Europa e no resto do mundo
Segundo os datos facilitados este venres por Sanidade, en Europa notificáronse polo menos 3.090.728 casos confirmados ata a data e Rusia segue no primeiro posto, con 834.499, seguida do Reino Unido, con 302.301, e de España, á que segue Italia, con 247.158 contaxios.
A nivel mundial notificáronse polo menos 17.064.064 casos e 668.073 falecidos, con Estados Unidos no primeiro posto, ao sumar un total de 4.405.932 infeccións e Brasil no segundo, con 2.483.191.