CRTVG

Buscar

Os bombeiros sufocan dous incendios en vivendas da Coruña en oito horas

Publicado o 24/05/2019 14:04

En oito horas, os bombeiros da Coruña tiveron que sufocar dous incendios en vivendas da cidade.
Só causaron danos materiais nas respectivas cociñas.

Contra as oito e media da mañá os bombeiros da Coruña recibiron a alerta dun incendio nun piso da céntrica rúa de San Andrés. A intervención dos equipos de urxencia obrigou a cortar o tráfico na metade da rúa durante boa parte da mañá. O sinistro non causou danos persoais. Na vivenda había dúas persoas que puideron saír ao tellado cando se decataron de que había lume na lavadora situada nun cuarto anexo á cociña. 

 Juan Manuel Morandeira, suboficial dos bombeiros da Coruña: "Inundou toda a cociña de fume. Os propietarios tiveron a sorte que puideron saír ao tellado. Nós tivemos o problema para entrar porque a porta era acoirazada e foi complicado abrila".

Horas antes, contra as doce e media da noite, tiveron que intervir nun edificio preto da praza de Catro Camiños cun camión escaleira, porque o lume era nun piso undécimo. Cando chegaron os bombeiros había unha ducia de persoas na rúa, que saíran polo seu pé do edificio. Tamén aquí o incendio se orixinou na cociña. Neste caso, un cacharro que quedou ao lume por un descoito dun habitante da casa. O fume estendeuse por toda a vivenda e a cociña quedou completamente estragada.

 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

24/05/2019