CRTVG

Buscar

Os alumnos galegos terán que aprobar todo para titularse no bacharelato e na ESO

Publicado o 18/11/2020 09:58

O conselleiro de Educación, Román Rodríguez, presentou este martes as "normas propias" de Galicia de desenvolvemento do coñecido como 'decreto de aprobado xeral' coas que se busca "non rebaixar o nivel".

Deste xeito, coa resolución publicada este martes pola Xunta vólvese aos criterios anteriores que xa rexían en Galicia antes da incidencia da pandemia.

Deste xeito, para titularse en bacharelato haberá que aprobar todo. Sucede o mesmo de forma xeral na ESO, "salvo casos moi excepcionais" polos que se poderá obter o título con dúas materias suspensas se hai acordo do equipo docente (sempre que non sexan conxuntamente lingua e matemáticas).

En declaracións aos medios en Santiago, nunha visita ao CAFI de Lamas de Abade, o conselleiro cargou contra este decreto impulsado de forma "unilateral" polo Goberno central, xa que "rompe a igualdade de oportunidades" e "desprestixia en gran medida o traballo de docentes e familias".

Mentres no decreto se establece que "un alumno poida titularse en ESO e en bacharelato con independencia das materias suspensas", a Xunta fixa que, con carácter xeral, para promocionar e poder ter a titulación de ESO e bacharelato hai que "ter as materias todas aprobadas", de forma que se busca "corrixir os efectos perversos" do texto.

E é que lamenta que a "desincentivación do estudo" é "moi prexudicial para unha sistema educativo como o galego", que se sitúa "en postos de referencia".

Deste xeito, a Xunta formulou unha queixa formal ante o Ministerio de Educación por este decreto que considera "antiequitativo" por restar a "motivación" do alumnado.

Román Rodríguez apunta que "o decreto xa non ten sentido"

Aínda que Román Rodríguez aprecia que no último trimestre do curso pasado esta norma "podía ter sentido" por "unha situación de excepcionalidade" polo confinamento, agora "non pode valer para un momento como o actual" en que se aposta por un sistema presencial.

De tal forma, asegura que en Galicia se van "manter" os criterios de avaliación e promoción de curso para "preservar a calidade e equidade".

Ademais, haberá unha "recuperación progresiva" dos contidos didácticos que "quedaron frouxos" no último trimestre do curso pasado.