CRTVG

Buscar

Joaquín Sabina, "estable" tras ser intervido dun hematoma intracranial

Publicado o 13/02/2020 12:10

O cantante Joaquín Sabina tivo que ser operado de urxencia este xoves a causa dun traumatismo intracranial e un derramo cerebral tras a caída que sufriu onte á noite minutos antes de comezar o concerto que tiña previsto ofrecer no Wizink Center de Madrid xunto a Joan Manuel Serrat, e que obrigou a cancelar a actuación.

Nestes momentos atópase "estable" e permanece ingresado na Unidade de Coidados Intensivos (UCI) do Hospital  Rúber Internacional de Madrid, tras ser intervido este xoves "para evacuación dun hematoma  intracraneal en hemisferio dereito", segundo o parte médico facilitado aos medios. O artista presenta "traumatismo de ombreiro esquerdo, torácico e cranioencefálico" como consecuencia da caída que sufriu desde o escenario do Wizink Center da capital española cando ofrecía un concerto xunto a Joan Manuel Serrat.

Foi o seu representante, José Navarro "Berry", quen explicou que este informe ofrecido pola familia "tardou" máis do que se esperaba para que fose "claro e amplo".

"Nunha situación como esta é todo moi cambiante", limitouse a engadir o mánager de Sabina, moi nervioso por todo o acontecido, antes de recalcar que, como en todos estes casos, "as primeiras 48 horas son importantísimas".

Está previsto que se facilite outro parte médico coa súa situación mañá venres ao mediodía. "Estas cousas só me pasan en Madrid, síntoo moitísimo", desculpábase onte ao reaparecer sobre o escenario, nunha cadeira de rodas empuxada por Serrat, tras unha xornada aciaga na que casualmente cumpría 71 anos.

Tras serlle realizados varias análises, á primeira hora da mañá de hoxe o diagnóstico limitábase a tres fisuras "limpas e sen desprazamento" no ombreiro esquerdo, pero posteriormente observóuselle un pequeno golpe na cabeza, do que terminou sendo operado para eliminar un hematoma.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí