O xuíz do caso Villarejo rexeitou o recurso presentado por Pablo Iglesias contra a decisión de retirarlle a condición de prexudicado no caso que investiga o roubo dun teléfono móbil dunha ex-asesora de Podemos, Dina Bousselham.

O vicepresidente do Goberno pedía que se mantivese a súa condición de vítima dun delito de descubrimento e revelación de secretos. Segundo o xuíz, Iglesias tivo esa condición ao comezo da investigación, pero a evolución da instrución do caso conduciu a revogar a súa consideración como prexudicado.

García Castellón argumenta, en primeiro lugar, que Pablo Iglesias tivo no seu poder a tarxeta do teléfono de Dina Bousselham antes de que se creasen os arquivos achados en poder de José Manuel Villarejo. Neste sentido, a investigación, di o xuíz, acreditou que recibiu a tarxeta o 20 de xaneiro de 2016 e que non se atoparon en poder de Villarejo dispositivos con esa información anteriores ao 14 de abril dese ano.
 
Como segundo argumento, o titular do Xulgado Central de Instrución 6 indica que Pablo Iglesias ocultou a Dina  Bousselham a posesión da tarxeta de memoria ata meses despois.

"Inférese do actuado que o señor Iglesias, a pesar de ser coñecedor do contido da tarxeta e da subtracción da mesma, non devolveu a Dina a tarxeta ata tempo despois, con consecuencias para o esclarecemento dos feitos investigados", sinala o maxistrado.
 
Este comportamento, continúa o instrutor, maniféstase incompatible coa dimensión que o recorrente pretende dar á subtracción da tarxeta "e desvincúlao completamente do argumentario sostido, respecto a a presunta inxerencia política".
 
O xuíz considera importante remarcar que o recorrente recibiu a tarxeta de mans de Antonio Asensio e non lle dixo nada a Dina a pesar de saber que contiña información persoal e íntima da súa titular e que, ademais, a tarxeta fora obtida de forma ilícita.
 
Para o xuíz García Castellón esta pasividade resulta incoherente coas manifestacións realizadas en sede xudicial por Iglesias, e "confirman (de novo) que non pode ser tido por prexudicado en ningún caso".
 
No seu auto, o maxistrado apunta que a omisión de Pablo Iglesias tivo influencia na investigación dos feitos que Dina  Bousselham pretendía esclarecer.
 
Por último, a resolución explica que Pablo Iglesias devolveu a Dina  Bousselham a tarxeta do móbil danada, que incluía imaxes de capturas de intervencións do líder de Podemos en grupos de mensaxería.
 
O maxistrado di que se descoñece o motivo polo que  Bousselham fixo estas fotografías, pero resulta acreditado que cando Iglesias accedeu ao contido da tarxeta, o 20 de xaneiro, puido ver que estas imaxes estaban alí como el mesmo recoñeceu, admitindo que examinou o dispositivo nun computador da sede do grupo editorial de Asensio.
 
Ademais, o xuíz explica que a propia Dina declarou en sede xudicial que Pablo Iglesias sabía o que había dentro da tarxeta porque el mesmo díxollo.
 
"É probable -conclúe o xuíz- que este último apuntamento poida ser a clave para entender non só porque Pablo Iglesias  Turrión non devolveu a tarxeta á señora  Bousselham, senón o máis relevante: o estado en que lla devolveu".