As autoridades haitianas informaron nas últimas horas de que son 724 os mortos, 2.800 feridos e centos de desaparecidos as vítimas que deixa o terremoto de magnitude 7,2 graos que sacudiu o país o sábado. Milleiros de vivendas quedaron destruídas.

Os haitianos buscan posibles superviventes e vitimas mortais entre os edificios estragados. Fano a marchas forzadas, tendo en conta que entre mañá e pasado chegará a tormenta tropical Grace e o servizo meteorolóxico estadounidense prevé fortes precipitacións e asolagamentos no territorio de Haití.

 O número de falecidos aumenta progresivamente en cada reconto.O primeiro ministro, Ariel Henry, recoñece problemas sanitarios nun sistema hospitalario precario xa desbordado pola pandemia. Este domingo trascendía que esta catástrofe vai aprazar as eleccións presidenciais de setembro polo menos ata o mes de novembro. Hai que ter en conta que o presidente do país perdeu a vida hai un mes a mans dun grupo de mercenarios.

A violencia endémica, a inestabilidade política, a enorme pobreza, a pandemia e as catástrofes naturais reiteradas conforman un cóctel dramático que golpea Haití case sen tregua. O acceso a algunhas das zonas máis afectadas, mais aló das cidades, é moi difícil porque están controladas por bandas armadas desde o mes de xuño. As mostras de solidariedade van desde o presidente da ONU ata o papa Francisco, pasando polos países veciños e numerosas ONGs, que comezaron a enviar axuda este domingo e que tentan suplir desde hai anos as deficiencias do Estado.