CRTVG

Buscar

O profesorado galego, en folga para recuperar o horario anterior á crise

Publicado o 12/12/2019 08:49

Os profesores galegos fan folga este xoves. A campaña de mobilizacións emprendida polos sindicatos docentes desembocará nunha xornada de protestas, en que estas organizacións marcharán de forma unitaria nunha manifestación polas rúas de Santiago de Compostela para reclamarlle á Xunta a redución do horario lectivo e o regreso á xornada previa aos recortes do sistema educativo.

As mobilizacións están convocadas polos sindicatos da mesa sectorial de Educación (CIG-Ensino, CC.OO. Ensino, FeSP-UXT e ANPE), STEG e CSIF, co obxectivo de esixirlle ao Goberno galego que dea marcha atrás aos recortes emprendidos polo Goberno de Alberto Núñez Feijóo a partir de 2011. Particularmente, reclaman que se anule a ampliación do horario lectivo dos docentes, que supuxo o paso de 21 a 25 horas en primaria e de 18 a 20 en secundaria.

Os sindicatos acusaron a Consellería de Educación de negarse a negociar a devolución desta medida, a pesar de que outras comunidades autónomas do Estado están a recuperar este dereito perdido dos docentes durante a crise económica, cando o Goberno central decidiu impor este horario no territorio de forma similar ao que fixo a Xunta un ano antes. Así, as organizacións acordaron un calendario de medidas de presión e reivindicativas que culminarán o xoves coa folga nos centros educativos e cunha marcha que sairá da praza de Cervantes de Santiago ás 12,00 horas.

A comitiva percorrerá a Algalia de Arriba e San Roque ata chegar ás dependencias da Consellaría en San Caetano, onde diversos representantes dos sindicatos docentes lerán un manifesto para reclamar a reversión dos recortes. En concreto, denuncian o empeoramento das condicións de traballo dos docentes tras as medidas dos gobernos do PP, ademais da "desatención" aos alumnos con necesidades especiais, en paralelo aos recortes orzamentarios e a perda de máis de mil postos de profesorado nos corpos de secundaria, entre outras.

A protesta conta co apoio de organizacións do alumnado galego e algunha delas unirase á marcha cunha manifestación propia, ademais dos grupos políticos que conforman a oposición ao Partido Popular.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

12/12/2019