O prezo da luz subiu hoxe sete euros respecto a onte e deixa un novo máximo histórico, o oitavo no que levamos de setembro: 189,9 euros o megawatt hora no mercado grosista. Iso de media, porque na franxa máis cara, entre as oito e as nove da noite, superará os 208 euros. Mentres que o tramo máis barato xa pasou, con 167 euros, entre as catro e as cinco da madrugada.

O prezo da electricidade multiplica por máis de tres o que se pagaba nas mesmas datas do ano pasado. E no que vai de setembro aumentou un 46 % respecto a agosto. A escalada dos prezos está afectando a boa parte de Europa polo encarecemento do gas natural e dos dereitos de emisión de CO₂. Pero o impacto na factura varía segundo o país.