Unha media de oitenta transatlánticos atracan anualmente nos peiraos de Vigo onde operan xa dúas terminais de cruceiros xestionadas por senllas consignatarias.

Esta semana a cidade recibirá cinco grandes buques, algunha das escalas non estaba prevista, pero recalou en Vigo, grazas a ser o mellor porto refuxio do Atlántico en casos de temporal. Agora as consignatarias traballan en converter Vigo en porto de saída e termo de cruceiros, xa que é o que xera maiores beneficios económicos para a cidade.

Moitos dos habituais dos cruceiros xa coñecen ben o porto e a cidade, outros chegan por primeira vez. Neste de hoxe atopamos rusos, australianos, españois, británicos e franceses.

A vella zona da Pedra, cos comercios e as ostras, é unha das zonas que recibe máis turistas e tamén o centro comercial da Laxe.

Os comercios, os guías turísticos, as navieiras que viaxan ás Cíes son os grandes beneficiados das visitas dos cruceiros que levan arribando e saíndo de Vigo desde os tempos fortes da emigración.