Nunca antes baixara tanto o paro nun só mes en España: xullo pechou con case 198.000 desempregados menos. É un descenso dun 5,4 % que deixa o total de parados en 3.416.000.

O desemprego baixa nove puntos respecto ao verán pasado, pero aínda hai 400.000 desempregados máis que antes da pandemia. E as cifras non inclúen ás maís de 300.000 persoas que aínda están en ERTE.

Coa caída do paro en xullo, encadéanse tres meses seguidos con baixadas récord. Dende maio borráronse das listas do desemprego medio millón de persoas.

En Galicia o paro baixou en xullo en máis de 5.700 persoas, un 3,67 %. E o total de parados queda algo por riba dos 150.000. O desemprego baixou trece puntos dende o verán pasado. E hai menos paro rexistrado que antes da pandemia.

En xullo a Seguridade Social gañou máis de 14.500 cotizantes en Galicia. É unha suba dun 1,4 %. E no conxunto de España aumentaron as afiliacións un 0,4 %. Hai máis de 19 millóns e medio de ocupados.