Os tres grupos do Parlamento de Galicia aprobaron por unanimidade unha iniciativa en que piden recorrer a sentenza do pazo de Meirás que establece unha indemnización para a familia Franco polos gastos de conservación do inmoble. Pretende evitar, en último caso, "que os herdeiros do espolio obteñan ningún beneficio económico do mesmo".

O texto aprobado, en base a sendas mocións do BNG e do PSdeG, "apoia e demanda" que o Goberno e a Xunta "interpoñan os recursos oportunos contra a sentenza da Audiencia provincial da Coruña".

O Executivo central xa confirmou este martes que vai presentar un recurso de casación contra o veredicto. E a Xunta, segundo anunciara o presidente hai uns días, e confirmou en sede parlamentaria o deputado popular Alberto Pazos Couñago, "estará ao lado do Estado presentando ese recurso".

Diferenzas durante o debate

Malia a unanimidade, durante o debate os grupos amosaron as súas diferenzas. O BNG considera que foi a presión social a que "conseguiu dobrarlle o brazo ao Goberno e á Xunta" para recorrer, algo que inicialmente non estaba previsto.

Para o PSdeG, foi a "vontade dun Goberno progresista", ao igual que todo o proceso para conseguir a titularidade pública do pazo, que non se dea ás "pancartas e ao populismo”.