CRTVG

Buscar

O pacto con Bildu abre unha fenda entre o PSOE e Unidas Podemos

Publicado o 21/05/2020 17:21

• Tensión entre Moncloa e o grupo socialista: Calviño freou a derrogación íntregra da reforma laboral tras coñecer o acordo | Iglesias defende que hai que cumprir o asinado | Vox abandona a Mesa da Reconstrución | O PP denuncia "pactos escuros"

 

O pacto que asinaron os grupos parlamentarios do PSOE, Unidas Podemos e EH Bildu abriu unha fenda no Goberno de coalición ao se destaparen as diferenzas sobre o alcance da derrogación da reforma laboral.

O documento, que por sorpresa se anunciaba a última hora deste mércores e estaba asinado polos voceiros no Congreso de PSOE, Podemos e Bildu, comprometía ás partes á derrogación íntegra da reforma laboral que o PP aprobou en 2012.

Tres horas despois, segundo varios medios, por mor da disconformidade da ministra de Economía, Nadia Calviño, o PSOE matizaba: a derrogación só afectará a algúns aspectos da lexislación.

Pablo Iglesias lembra que o acordo de Goberno non falaba de derrogación parcial e o documento deste mércores tampouco: "Ese é o acordo. E logo se cada partido quere facer as súas consideracións, moi ben. Pero o asinado e escrito nun papel é o que se acordou. Creo que estou sendo cristalino".

O PSOE transmitiu unha idea diferente: José Luis Ábalos, secretario de Organización do PSOE, di que "é un pouco a referencia que facía o Partido Socialista no seu programa electoral, nós sempre chamamos a eses puntos os aspectos lesivos da reforma laboral, e ese é o acordo. Hai que axustarse á aclaración".

A última hora da mañá, a portavoz socialista no Congreso, Adriana Lastra, negou que houbese ocultación das negociacións, incluso unha rectificación posterior, e resaltou que o que pretende o Goberno é derrogar os aspectos máis lesivos da reforma laboral, non derrogala enteira.

Entre as declaracións de Iglesias e as de Lastra fóronse sucedendo as críticas da oposición, e tamén actuacións de protesta.

Vox abandonou as sesións de traballo da nova Comisión do Congreso para a Reconstrución, e a portavoz do PP no organismo, Ana Pastor, pediu que non haxa máis "pactos escuros" como o de Bildu neste proceso de recuperación do país.

Para Elvira Rodríguez, vicesecretaria de Sectorial do PP, "o pacto de Sánchez cos batasunos pon en perigo o emprego de millóns de españois e abócaos ás colas da fame".

Máis tarde, o líder dos populares, Pablo Casado, advertiu dos riscos que supoñería terminar co modelo laboral que aprobou o Goberno de Mariano Rajoy. O PP augurou "colas da fame" se isto ocorre.

Cs, un dos artífices de que a quinta prorrogación do estado de alarma fose autorizada, rexeitou que o modelo laboral cambie sen o concurso dos axentes sociais; así o manifestou o portavoz adxunto do grupo no Congreso, Edmundo Bal. Pero fontes da dirección nacional deste partido sinalaron  o seu convencemento de que non se derrogará nos termos do pacto subscrito con EH Bildu.

O vaivén sobre ata onde chegará a posible derrogación da reforma laboral non cesou desde que terminou a votación da nova prórroga do estado de alarma.

Nunha liña similar expresouse horas antes a portavoz no Congreso, Mertxe Aizpurua, unha das asinantes. "Naturalmente que non é papel mollado", subliñou a RNE. Aínda que cando a entrevistou TVE non se produciu toda esta serie de matizacións, o portavoz de ERC, Gabriel Rufián, prognosticou máis declaracións "contraditorias" do PSOE e de Podemos, pois, subliñou, forman "unha coalición complicada".

Malestar tamén nalgúns baróns socialistas. O presidente de Castela A Mancha, Emiliano García Page, declarouse doído e perplexo polo pacto, e o valenciano Ximo Puig pediu a volta á mesa do diálogo social.

Noticias web

21/05/2020