Os infinitos universos en que nos permiten entrar os videoxogos levan atrapando seguidores desde os anos 70. Naceu daquela a primeira consola, unha das pezas sagradas da colección que iniciaron dous irmáns de Cangas e que foron o xermolo do Museo do Videoxogo de Galicia, que se inaugurou en febreiro do ano pasado.

As catro empresas galegas máis fortes dedicadas a crear videoxogos venden en todo o mundo centos de miles de cada un dos seus títulos. Esta é unha industria que medra tan rápido como se moven os seus protagonistas na pantalla e no mundo xa factura máis que o cine e a música gravada xuntos.

Todas as máquinas e videoxogos que se poden atopar neste museo funcionan: oito xeracións de consolas e máis de 2.000 xogos. E o mellor de todo é que se poden probar.