Coa eterna división entre as necesidades dos clientes, hoxe remata Teoauto, a primeira feira do automóbil do Milladoiro, preto de Santiago de Compostela, que pretende converterse nun referente para aqueles que necesiten cambiar de vehículo. E non semella ir mal, porque dende os seis concesionarios participantes, adiantan uns bos resultados.

Afirma Elena Pazos, asesora comercial: "Estamos supercontentos, está indo moi ben. Esperabamos ter éxito pero non tanto, porque é a primeira vez que se fai e temos moitísima xente estes días".

O evento pon a disposición do público uns seiscentos automóbiles cuns descontos que poden chegar ata os trece mil euros en coches novos, e con bos reclamos tamén dentro dos usados. A oferta é moi variada.

"Estamos vendendo coche xeralista, barato, moito coche premium - relata Iván Falcón, asesor comercial-. O coche premium é un produto que se está movendo moi ben porque ten un desconto moi grande. Estamos vendendo Mercedes GLC, que é un coche que está arredor de setenta mil euros, novos, e que os estamos vendendo por trinta e cinco mil euros.

Sen esquecer as precaucións pola covid, os clientes que se achegaban esta mañá ata O Milladoiro buscaban ante todo bos prezos, porque tiñan moi claro cal era o coche que querían.

"Temos unha idea de por onde movernos. A partir de aí, verase o que hai, e co prezo xa hai que contar", contaba un posible comprador.

"Teño a idea de buscar un coche destes bos, altos, porque na miña idade hai que buscar destes coches altos para sentarse. A idea téñoa, pero fáltame o poder", comentaba outra clienta.

Esta primeira feira Teoauto continúa este serán e, polos resultados, con ata dez coches vendidos nunha soa xornada nalgún concesionario, as empresas participantes prometen repetir experiencia.