Juan Manuel Rosales foi golpeado na cara esta mañá nas proximidades do mercado de abastos cando repartía folletos informativos do seu partido canda outros compañeiros. Vox sopesa agora denunciar o mozo, o mesmo que hai tres anos agredira a Mariano Rajoy, como presunto autor dun delito de terrorismo porque cren que esta agresión se enmarca dentro dunha campaña de ameazas que están a recibir a través das redes sociais.

A primeira hora da tarde, o partido de Santiago Abascal reaccionaba ao ataque contra o seu coordinador local en Pontevedra, Juan Manuel Rosales. Ocorreu na praza de abastos onde a formación instalara unha mesa informativa. Dacordo co relato do político, recibiu varios puñazos na cara e tivo que ser atendido nun centro hospitalario.

Segundo fontes da investigación, o agresor, alcumado Capi, recoñeceu os feitos. O mozo, cando aínda era menor, atacou nesta mesma cidade a Mariano Rajoy. Deulle unha labazada durante un paseo pero o daquela presidente do Goberno non exerceu ningunha acción contra el. Malia todo, foi condenado a dous anos de internamento en réxime pechado como autor dun delito de atentado á autoridade. Desta volta, xa maior de idade, non foi detido pero deberá responder ante a xustiza como suposto autor dun delito de lesións. Ademais, Vox sopesa denuncialo por terrorismo.