Xa se coñecen máis datos de como será unha das grandes citas urbanas do verán galego: o festival do Marisquiño de Vigo. A seguridade dos deportistas e do público será a prioridade, nun festival con restricións e adaptado á normativa sanitaria.

No Marisquiño de 2021 aínda non será posible revivir imaxes que se viron en edicións anteriores. Todas as probas previstas realizaranse en espazos delimitados con capacidades reducidas e con entradas nominais.

Porén, que se poida celebrar é un importante paso para dinamizar a economía da cidade. Celébrano os hostaleiros e, en xeral, a cidadanía.

As novas tecnoloxías permitirán achegar o Marisquiño ao mundo, tamén a súa imaxe gráfica pioneira que conecta coa vangarda, cos mozos urbanos e que simboliza un novo comezo.