Os mercados de produtos frescos, con aumento de demanda polo Nadal, viven unha semana de tránsito entre as das vendas adiantadas para conxelar e as da frescura de última hora.

Faltan nove ceas para que chegue a de Noiteboa e así vai a venda de marisco, polo que nos contan dúas vendedoras nos seus postos da praza de Pontevedra.

Rocío coméntanos que esta semana veu algo máis frouxa. "Quen merca para conxelar xa o fixo para aforrar algo e os que queren fresco agardan á semana que vén", asegura.

Montse está segura de que a semana que vén haberá máis movemento. "A xente está a consultar os prezos e esta semana... a ver como resulta", di. 

Outro dato significativo é que a demanda para o consumo na casa é maior ca o ano pasado, o que compensa a caída dos restaurantes.

As restricións pola pandemia condicionan tamén a celebración no ámbito familiar.

Para a semana que vén os prezos subirán, previsiblemente, pero respecto a hai un ano, dinnos, están notablemente máis baixos.

"A centola este ano está para 30 euros a boa, a boa. O camarón que se traballaba moito para restauración tamén baixou moito ao estar pechada e arredor de 80 euros xa se pode vender. A nécora si que está un pouco máis cara, porque hai moi pouquiña este ano", asegúrannos no mercado.

Hai nécora, hai cigala, hai boi, hai vieira... O que hai máis escaso está é o percebe por culpa do tempo.

E é que as condicións atmosféricas son outro factor determinante no prezo deste tipo de produtos.