CRTVG

Buscar

O Lugo volve gañar oito xornadas despois cun gol de Cristian Herrera

Publicado o 18/01/2020 22:56

O último triunfo lucense tamén fora contra o Albacete

O Lugo apúntase a xogar co Albacete. Hai máis de dous meses, os lucenses vencían no Carlos Belmonte e desde entón estivo oito xornadas sen gañar. Ata que volveron enfrontarse aos manchegos.

Daquela o Lugo disparou dúas veces a porta e marcou un gol. Desta mellorou os seus rexistros e bastoulle para impoñerse a un Albacete superior no primeiro tempo no que rematou once veces, estrelou un balón no poste e Cantero tivo que intervir en dúas ocasións.

Os de Curro Torres apenas inquedaron en ataque. Aínda así, houbo dúas xogadas polémicas nas que pediron penalti. A primeira por derrubo de Alvaro Benito a Kravets,

E na segunda por man de Kecojevic, que xa contaba con cartón amarelo. En ambas ocasións o VAR considerou que non había nada sancionable.

O segundo tempo foi do Lugo que nada máis comezar puido adiantarse nunha cabezada de Manu Barreiro tras centro de Valentín, o máis incisivo dos branco e vermellos.

Unha e outra vez, o catalán foi un puñal pola banda dereita e incluso apareceu polo centro para asistir a Cristian Herrera no gol da vitoria á hora de xogo.

Unha recuperación no medio campo, posibilitou unha contra rápida do Lugo que Cristian Herrera converteu no seu oitavo gol na Liga.

O propio Cristian Herrera dispuxo doutra boa ocasión nesta cabezada logo dunha falta sacada por Álex López.

E pouco despois Jaume Grau puido pechar o partido nunha boa acción individual rexeitada por Tomeu Nadal.

Con esta vitoria, o Lugo durmirá fora da zona de descenso.



 

Noticias web

18/01/2020