O Liceo non depende de si mesmo. Quedan dúas xornadas e o primeiro é gañar o sábado ante o Herringen en Alemaña e logo esperar o resultado do outro partido do grupo.

"Iso é culpa nosa, porque non fixemos o noso traballo no seu momento e agora non dependemos de nós de momento", di o liceísta Carlo di Benedetto,

No enfrontamento entre o Forte dei Marmi e o Sporting de Lisboa, en Italia, ao Liceo só lle vale unha vitoria dos portugueses, que de momento lideran o grupo e non coñecen a derrota. Pero o empate válelles aos dous conxuntos, os dous clasificaríanse e deixarían fóra da competición un Liceo que sempre é un rival temible. A sospeita sobre un posible pacto de non agresión sobrevoa o partido.

"Espero que non, que os dous sexan xustos e xoguen para gañar o partido", confía Edu Lamas.

"Penso que os dous equipos van saír gañar porque os dous equipos poñen en xogo ser primeiros de grupo", explica Josep Lamas.

Se o Liceo gaña e o Sporting vence en Italia, os coruñeses xogarían unha final na última xornada ante os italianos en Riazor onde deberían remontar a diferenza de goles para poder clasificarse como segundos.