O grupo empresarial Riesgo, novo propietario das antigas plantas de Alcoa en Avilés e A Coruña, reafirmou este martes o seu compromiso co mantemento da actividade e o emprego de ambas factorías, que suman máis de 600 traballadores.

A entidade indicou nun comunicado o seu obxectivo de levar a cabo unha reconversión das dúas plantas "para lograr posicionalas no polo industrial de aluminio verde circular máis importante do sur de Europa" para consolidar "un proxecto de futuro".

Tras a compra das plantas a Parter, en abril, o grupo Riesgo anunciara un investimento de 250 millóns de euros en cinco anos. Asegura que xa adoptou "numerosas medidas e investimentos que estaban atrasados".

Neste senso, apunta á creación dun departamento comercial para ambas plantas e investimento "en procesos, maquinaria e programas informáticos".

Dende Grupo Riesgo reiteraron o seu compromiso co futuro das dúas plantas o mesmo día en que o comité de empresa de Avilés reiterou a necesidade de que o Goberno central interveña para despexar o futuro industrial e do emprego.