Preocupación tamén na comarca da Limia polos gromos detectados en Vilar de Barrio, un foco que xa se estende aos concellos de Laza e de Xinzo de Limia. Esta repunta obrigou a hospitalizar un matrimonio de anciáns. En total, hai nove casos activos relacionados con esta familia, mentres que o brote que se localizou en Baños de Molgas se mantén en tres. Os casos activos na provincia de Ourense son 17, segundo confirman fontes da área sanitaria. 

A alarma social vai medrando na tranquila localidade de Vilar de Barrio por mor do gromo de coronavirus detectado na aldea de Porto e que suma 2 casos positivos en Xinzo co que xa son 9 as persoas contaxiadas.

14 persoas relacionadas coa parella de nonaxenarios contaxiada están gardando a corentena. E o Concello de Vilar de Barrio optou por tomar medidas de protección como a intensificación das desinfeccións, a suspensión de actividades de lecer ou o peche preventivo e temporal da piscina municipal. O alcalde lanza unha mensaxe de tranquilidade.

En Xinzo o Concello tamén informa deses dous novos casos relacionados co gromo Vilar de Barrio. A vila está estes días de xente e os veciños din que cómpre non baixar a garda.

Desde o mércores o número de casos de coronavirus duplicouse na área sanitaria de Ourense, unha das de menos incidencia, e en total, son xa 17 os casos activos. Só tres están ingresados no CHUO, a parella de 90 e 91 anos de Porto, e unha muller de 79 de Baños de Molgas, alí os casos seguen sendo 3. As outras 14 persoas contaxiadas están co seguemento da enfermidade no domicilio.