O Goberno xa solicitou á Comisión Europea que se estenda o marco extraordinario de axudas públicas de resposta á covid-19 máis aló do 31 de decembro para poder ampliar o prazo das axudas directas de 7.000 millóns para pemes e autónomos, segundo confirmou a vicepresidenta primeira e ministra de Asuntos Económicos e Transformación Dixital, Nadia Calviño.

Tal e como reprochou esta semana a portavoz do Goberno e ministra de Política Territorial, Isabel Rodríguez, a vicepresidenta tamén sinalou que as comunidades, que son as encargadas de xestionar estes fondos, despregaron de forma desigual as axudas directas. "É verdade que o ritmo de execución das comunidades e está a ser moi desigual e hai algunhas que nos anunciaron que van terminar de executalas en breve e outras van máis atrasadas", sinalou a vicepresidenta nunha entrevista en Onda Cero, recollida por Europa Press.

Ante isto, Calviño defendeu que o Goberno prestou "todo o apoio posible" ás comunidades que van máis lentas, pero ante estes atrasos solicitouse a ampliación do prazo co obxectivo de que cheguen a un conxunto máis amplo de empresas afectadas pola pandemia.