CRTVG

Buscar

O Goberno estuda un regreso ás aulas voluntario e con prioridade para os estudantes máis vulnerables

Publicado o 27/04/2020 18:51
O Goberno estuda un regreso ás aulas voluntario e con prioridade para os estudantes máis vulnerables

O Goberno estuda que o retorno ás aulas sexa voluntario tanto para alumnos como para profesores e dá prioridade aos estudantes que se atopen nunha situación máis vulnerable. Aqueles que non puideron seguir a educación a distancia desde que se suspenderon as clases presenciais, tamén escolares que padeceran os estragos da pandemia na súa familia. 

Estas son algunhas das propostas que manexa o Goberno no ámbito educativo:

• O Executivo non considera unha data concreta para volver abrir os centros educativos, pero comeza a definir as condicións hixiénicas e sanitarias para ese regreso ás aulas a final de curso, sempre que a evolución da pandemia o permita.

• A continuación das clases presenciais só se prevé de maneira parcial e simultánea ao actual ensino a distancia.

• Sería voluntaria, tanto para escolares como para docentes, o cal evitaría a incorporación de profesores con síntomas ou doenzas que os fagan estar entre a poboación de risco. 

• Os estudantes de segundo de bacharelato, cuarto de secundaria e de educación especial serían os primeiros en pisar unha aula, de se daren as condicións axeitadas. Así o indican fontes do Goberno.

• Despois do grupo mencionado máis arriba, incorporaríanse o resto de estudantes de bacharelato e secundaria. Despois, os de primaria, e en último lugar os de educación infantil.

Desinfección completa das instalacións antes da reapertura. Os centros educativos tamén terían que dispoñer de xeles e máscaras suficientes.

• Habería que garantir unha separación de dous metros entre pupitres, que obrigaría a reducir os grupos e clases á metade. 

• Escalar a entrada e permanencia no centro educativo dos estudantes para evitar aglomeracións ás portas do colexio.

Descartaríase a apertura dos comedores escolares e prolongaríase durante un tempo fórmulas alternativas para garantir a alimentación dos escolares con bolsa.

 

Medidas similares ás adoptadas en Francia 

Moitas destas medidas planificadas polo Goberno son similares ás adoptadas en Francia. Alí preparan un regreso "gradual" dos estudantes a partir do vindeiro 12 de maio e limitarán a 15 o máximo de alumnos por aula. Comezarán polos de menor idade, os estudantes de infantil e primaria ata os 11 anos, segundo explicou o ministro de Educación, Jean-Michel  Blanquer. Xa durante a semana do 18 de maio, volverían o resto dos de primaria xunto aos de secundaria, e tamén os de instituto e Formación Profesional.

Finalmente, na semana do 25 de maio retomaríanse "o conxunto das clases". No país galo, a volta á clase tampouco suporá a fin do ensino a distancia. Segundo precisou o ministro de Educación, só abrirán os centros que cumpran coas esixencias sanitarias de contar con xabón ou xel  hidroalcólico para o lavado de mans.