CRTVG

Buscar

O Goberno central anuncia a rebaixa do IVE das máscaras do 21% ao 4%

Publicado o 11/11/2020 13:05

• María Jesús Montero confirmou que a Comisión Europea non se opón á baixada do imposto

• O Executivo di que estará vixiante para comprobar que se produce unha rebaixa no prezo

A ministra de Facenda e portavoz do Goberno, María Jesús Montero, anunciou este mércores no Congreso que o Consello de Ministros aprobará a próxima semana un decreto lei para a rebaixa do IVE das máscaras do 21% ao 4%.   

Na súa defensa do proxecto de orzamentos xerais do Estado, que se enfronta a partir deste mércores no Congreso ao seu debate de totalidade, Montero asegurou que o Goberno adoptou esta medida tras obter unha "garantía por escrito" da Comisión Europea de non abrirá un procedemento de infracción.

Montero asegurou que o Goberno estará "vixiante" para que esta baixada do IVE se "traduce nunha rebaixa do prezo para o consumidor final e non nunha maior marxe empresarial". Ademais, avanzou que o Goberno tramitará unha rebaixa do prezo de venda ao público a partir deste xoves.   

O Goberno defendera que non podía baixar o IVE das máscaras porque o impide a directiva europea, algo que a ministra insistiu este mércores que é así, aínda que a Comisión non abrirá procedemento de infracción por iso aos países que xa reduciron este imposto.

"Somos un Goberno sensible, atento e que atende os problemas da xente", insistiu a ministra. A medida aprobarase o martes que vén no Consello de Ministros e o xoves abordarase a redución do prezo máximo de venda nunha comisión interministerial.