Malia que neste caso hai seis acusados, Ramón López Casal, administrador único da inmobiliaria Mahia desde que entrou na sociedade, no ano 91, eríxese como o cerebro das operacións de compravenda que se xulgan e deixa á marxe os outros cinco acusados, entre os que están dous fillos seus.

Non quixo responder as preguntas da acusación particular, que representa o seu ex-socio Manuel Gómez Maroñas, pero si as da fiscalía, que durante máis dunha hora de interrogatorio tratou de desenmarañar a trama de empresas e sociedades vinculadas a López Casal, máis de cincuenta segundo os datos do rexistro mercantil.

A fiscala, que pide para López Casal 12 anos de prisión por administración desleal, apropiación indebida e delitos societarios, considera que creou esa trama para desviar o negocio da inmobiliaria Mahia ás súas empresas particulares, sen renderlle contas ao ex-socio, que reclama dez millóns de euros.

El negouno reiteradamente. Proclámase o artífice do éxito empresarial de Mahia e asegura que cada un dos tres socios que compartían a partes iguais o capital da inmobiliaria tiña, a maiores, as súas propias empresas. Atribúe a unha estratexia de mercado e a simples cuestións administrativas os delitos que lle imputan.