CRTVG

Buscar

Os fortes trebóns causan danos en coches e deixan varias vilas sen luz

Publicado o 05/07/2019 19:48

Foron 10 minutos de pedrazo. "Case como ovos de galiña... Espantoso... Foi pouco tempo, pero vaia ruído facía. Asustámonos moito", explican en Lalín. Houbo danos eléctricos, nas colleitas, nas vivendas e sobre todo nos coches. "A partir das 7 empezaron a vir todos, amontoados. Sobre uns 40 ou 50. E esta mañá unha ducia máis", explica o responsable dun taller.

Hoxe é día de limpeza en Cimadevila, en San Xoán do Río. Hai lama na praza, nos sumidoiros e nas portas das casas. Entre os escasos veciños da aldea conseguiron frear a riada para protexer o gando, pero algún tiveron que sacalo da corte porque a auga xa lle subía dos xeonllos. "Cando cheguei aquí xa estaba todo cheo. Empecei a cavar, púxenme coma unha sopa, pero nada. Ata que parou de chover e xuntei a area e puxen unhas táboas". "E puxemos aí paus e pedras para poder arrebater a auga da corte. Pero arriba aínda é peor porque está tupida ata a cima de area", contan os veciños.

As treboadas nesta zona afectaron contra a tardiña. Caeu saraiba e moita auga, que fixo rebordar as fontes e sumidoiros. Tamén afectou a subministración eléctrica. En Río, na capitalidade municipal, estiveron sen luz desde as sete da tarde ata pasadas as tres da mañá.

A alerta non fallou e as treboadas deixaron en toda a provincia de Lugo unha mestura de choiva, saraiba e máis de 3000 raios. No centro da provincia en puntos coma este de Palas de Rei desbordaron río e regatos, con todo a peor parte rexistrouse na zona sur. Granizou con forza na Pobra do Brollón e en Monforte rexistráronse anegamentos nalgunhas rúas.

Tamén choveu con forza na Mariña e en Viveiro a tromba de auga mesmo chegou a paralizar durante un anaco a celebración do Resurrection Fest.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

05/07/2019