CRTVG

Buscar

O CSIC prepara unha vacina fronte ao coronavirus que aspira a ser 100% eficaz

Publicado o 29/10/2020 14:03

No Centro Nacional de Biotecnoloxía desenvolven unha das 12 vacinas españolas contra a covid-19. Un proxecto único que utiliza o propio virus modificado xeneticamente.

Sonia Zúñiga, investigadora do laboratorio de coronavirus do Centro Nacional de Biotecnoloxía–CSIC, explica que "o que facemos é quitar os elementos que son responsables de que o virus derive nunha enfermidade severa, e tamén todos os elementos que o virus necesita para diseminarse".

Algo que permitirá, din, que a inmunidade e a eficacia sexan máis completas fronte ás doutras vacinas.

"Todas as vacinas van ser seguras", engade Zúñiga, "co tempo haberá varias vacinas e a eficacia irá en aumento".

Un dos proxectos máis avanzados na actualidade é o que desenvolve a Universidade de Oxford coa farmacéutica AstraZeneca, que xa se está probando en máis de 50.000 persoas de todo o mundo. Os primeiros resultados indican que produce inmunidade en persoas maiores.

Carlos Estévez-Fraga, neurólogo no University College London e subinvestigador no ensaio da vacina de Oxford di que "non so se quere ver seguridade, tamén que a resposta inmunitaria é persistente e especialmente queremos coñecer a eficacia, se conseguimos que a vacina protexa fronte á enfermidade".

Os resultados definitivos poderían non chegar antes do vindeiro verán. Pero a Unión Europea fixo xa unha compra anticipada de máis de 300 millóns de doses da vacina de Oxford, dos que España recibirá máis de 31 millóns de viais.

Noticias web

29/10/2020