A práctica totalidade das probas realizadas esta fin de semana, como parte do cribado entre os veciños de Muros de 30 a 50 anos, deu negativa. Os datos facilitados polas autoridades sanitarias revelan un único caso indeterminado, ao que se lle repetirá a PCR en próximos días.

A xerencia da área Sanitaria de Santiago de Compostela e A Barbanza informou a pasada semana do cribado, motivado polo incremento de casos nos que non era posible seguir a cadea epidemiolóxica.

En total, acudiron ao centro de saúde 1.260 das 1.780 persoas citadas ao longo desta fin de semana, e unhas 300 persoas do rango de idade ao que estaba dirixido o cribado non puideron ser localizadas por non estar actualizados os seus datos sanitarios. A inmensa maioría das probas deu negativo, unhas 1.259 persoas, engaden desde o Sergas.

Na actualidade, a área de Santiago e A Barbanza conta 1.360 casos activos e 78 pacientes con covid-19 ingresados, 13 deles en UCI.