Quinta noite de altercados e un malestar evidente entre os Mossos. Ese era o marco de fondo no que se desenvolveu o encontro entre o conselleiro de Interior, Miquel Sàmper, e os sindicatos da Policía catalá. Os representantes dos axentes transmitíronlle que hai crispación no corpo polos cuestionamentos desde o ámbito político e que están ao límite para poder garantir a paz nas rúas.

O titular de Interior explicou que lles expresou confianza aos Mossos desde unha vontade compartida de mellora e que o obxectivo común é restablecer a orde. "Houbo unha violencia extrema. Temos a responsabilidade conxunta de traballar de forma conxunta, valla a redundancia, para tentar que isto dure o menos posible e para devolver a tranquilidade ás rúas de Cataluña", declarou Sàmper.

Matizou, iso si, que o modelo de orde pública será revisado con tempo e sosegadamente porque o reclama a maioría independentista: "É un ámbito suficientemente amplo de 82 deputados que demanda que haxa unha revisión da orde pública".

O conselleiro recoñeceu que a situación é moi complexa e que non se pode determinar canto tempo máis durarán os altercados nas rúas.