AXENCIAS

O Pleno do Congreso validou este xoves o decreto lei de recorte de beneficios extraordinarios das eléctricas polo sobrecusto do gas non asumido e aprobou a súa tramitación sen cambios ao rexeitar a súa admisión como proxecto de lei. Logrou o apoio de 182 deputados fronte ao rexeitamento dos 152 do PP, Vox, Cs, UPN e Foro Asturias. O PNV (6) e Junts (4) e o PDeCAT (4) abstivéronse.

Durante a súa defensa do decreto lei, a vicepresidenta para a Transición Ecolóxica Teresa Ribera recalcou o carácter temporal da maioría de medidas incluídas —o recorte os beneficios caídos do ceo é ata o 31 de marzo—, pero asegurou que traballa para non aplicalo á subministración de enerxía ás industrias a "prezos razoables". Concretamente, afirmou que o obxectivo é non aplicar este recorte a "quen garanta prezos estables que non internalicen a evolución do prezo do gas", co fin de "impulsar a cobertura de prezos razoables para a industria".

Máis tarde, a vicepresidenta aclarou que negocia coa industria e coas eléctricas as condicións de subministración ás plantas para favorecer contratos a medio e longo prazo a prezos estables, anteriores á actual escalada. A estas alturas, asegura que "as previsións de setembro (cando se aprobou este decreto lei) quedaron desfasadas", algo que "obriga a revisar medidas adoptadas xa" e "adaptalas".

Todo iso durante a defensa na Cámara Baixa do decreto lei cun plan de choque fronte á escalada de prezos da electricidade, cuxa principal medida é o recorte aos beneficios extraordinarios das eléctricas, que sen asumiren o sobrecusto do gas nos mercados internacionais recibiron retribucións moi por encima dos seus custos de xeración por esta alza. A vicepresidenta explicou as causas que provocaron un encarecemento do gas nos mercados internacionais e esgrimiu que isto "non pode traducirse nun incremento de toda a electricidade", polo que cre que manter o actual mercado "non é viable" ante unha situación deste tipo que se prolongue no tempo. "Sobre todo cando os custos reais de xeración non se corresponden co incremento de prezos medios do sistema", abundou Ribera.

O PP acusou a Ribera de propiciar unha situación ao non acometer investimentos necesarios na subministración de gas, acabar co carbón e expor ademais un peche acelerado da nuclear

O Congreso valida a prórroga dos ERTE ata o 28 de febreiro

O Congreso dos Deputados validou hoxe o decreto polo que se prorrogan os expedientes de regulación temporal de emprego (ERTE) ata o 28 de febreiro, cun novo esquema de axudas vinculado a que as empresas impartan formación e un modelo especifico para os afectados pola erupción do volcán da Palma. O decreto, defendido pola vicepresidenta segunda e ministra de Traballo Yolanda Díaz, foi aprobado con 294 votos a favor, 1 en contra e 53 abstencións. Todos os grupos do Congreso, excepto Vox, apoiaron a validación do real decreto lei, que agora se tramitará como proxecto de lei polo procedemento de urxencia.

Durante a súa intervención, Díaz defendeu que a protección que despregaron os ERTE na fase aguda da pandemia "segue sendo necesaria para seguir amparando empresas e persoas traballadoras" de certos sectores e actividades. Segundo Díaz, este mecanismo evitou "danos permanentes" no tecido produtivo e posibilitou que a recuperación económica sexa "máis rápida". "Os ERTE propiciaron a recuperación máis rápida da nosa historia. Fronte aos dez anos e 11 meses da crise financeira esta vez en 15 meses volvemos ao nivel da afiliación á seguridade social previos á crise", sentenciou a vicepresidenta segunda.