O Celta demorou 30 minutos á súa entrada no partido. Toni Kroos atopa a Benzemá entre un atado de pernas celestes para que o francés volva a demostrar que o oficio de dianteiro vai de serie na equipación de Karim. Control, reviravolta e gol. Mérito dos de Zidane.

Os de Coudet so amosaban a súa calidade a contagotas, mentres, Benzemá non deixaba de sorprender mesmo ao seu compañeiro Vinicius, que non agardaba que o seu centro chegase á súa posición.

E se o primeiro se anota no haber madridista, o segundo vai no debe céltico. Erro na saída, mal control de Renato Tapia e Benzemá volve ser preciso na definición. Rouba Toni Kroos, marca o francés, dous a cero. Tras media hora de xogo entraba o Celta no partido de cabeza. Agasallo de Denis Suárez, erro na marcaxe da defensa e remate académico de Mina. semellaba que había partido.

Sobre todo, por esta xogada sen premio que inicia Hugo Mallo e que finaliza Iago aspas cun lanzamento duro, abaixo, que saca moi ben Courtois. E se non era o porteiro belga era o centrocampista brasileiro Casemiro, quen desta volta peitea a pelota o xusto para que o envío de Aspas pete no ferro e marche ao limbo.

E o gol de Asensio a pase de Benzemá. Asensio celebra como quen marca un gol de refugallo tras perder a titularidade. O Madrid segue na loita pola liga, o Celta regresa ao seu obxectivo inicial.