O Celta levaba intentando fichalo desde o mercado de inverno. Era unha petición de Coudet que tiña o visto e prace da dirección deportiva e do presidente Mouriño, pero o Benfica, en xaneiro, preferiu reter a Franco Cervi e prestar a Facundo Ferreyra. E acabada a temporada o club lisboeta tensou a corda todo o que puido pero por fin está en Vigo.

Franco Cervi, RC Celta: "Si, chegou o día tan esperado. Estou moi contento".

Con Eduardo Coudet coincidiu no Rosario Central. O adestrador do Celta guiouno nos seus primeiros pasos como profesional. Aqui vemos o Chacho pedíndolle un caneo máis ó Chuky.

Franco Cervi, RC Celta: "Cando dei os primeiros pasos na Arxentina, el era o adestrado e vivimos grandes momentos. Espero que aqui tamén vivamos grandes momentos".

Nestes meses de espera Franco Cervi tivo tempo para ver o Celta: "Vin partidos da temporada pasada e hai moita calidade en todos os xogadores. Teño ganas de compartir os primeiros adestramentos e coñecelos máis". 

Ten semanas por diante para presentarlles a súa zurda ós compañeiros, que están de volta das vacacións. O Celta comezou este luns a súa pretemporada.