A executiva do Bloque Nacionalista Galego pediu este luns que se investigue "a fondo" a "corrupción da Casa Real" e que se xulgue "os Borbóns" polas súas actuacións, "con todas as consecuencias penais e políticas".

Nun comunicado remitido aos medios despois de que se coñecera a decisión do rei Xoán Carlos I de abandonar España, o BNG considera que "resolver esta situación cunha operación de imaxe" non fará máis que "reafirmar a evidencia de que, para perpetuarse, o réxime español opta por seguir tapando e ocultando a corrupción real, a expensas da verdade e da democracia".

Neste sentido, os nacionalistas galegos sosteñen que o anuncio comunicado este luns "responde a unha previsible operación por tentar salvar a monarquía e, especialmente, para desvincular ao rei Filipe VI da negociacións e da imaxe de corrupción do rei emérito" a pesar das "múltiples evidencias" que, segundo sinala, existen sobre que o "actual xefe do Estado estaba ao tanto da actuación de Xoán Carlos I e de que se beneficiou dela".

O Bloque asegura que "os múltiples escándalos que envolven os Borbóns xa non son ocultables", como as investigacións abertas polas comisións presuntamente cobradas de forma ilegal en relación ao AVE á Meca, cuestión que, a xuízo do BNG, "obrigou o réxime para idear unha operación de salvamento da monarquía que deu un primeiro paso en marzo e dá agora o segundo".

"Dentro desta estratexia está tamén a de tentar controlar a información e a investigación, aínda que iso supoña lexitimar socialmente a corrupción", apunta o BNG, que atribúe a iso o feito de que "as forzas políticas que sustentan o réxime do 78 se empeñen en impedir a investigación parlamentaria sobre as actuacións corruptas dos Borbóns".

Neste sentido, incide en que todo o que está a ocorrer ao redor da familia real "desacredita aínda máis" a unha institución que, segundo asegura, "xa é de seu anacrónica e antidemocrática".

"Non é posible sustentar que nunha democracia o xefe do Estado é hereditario e vitalicio en lugar de ser elixido polos cidadáns", apunta.

Por último, o BNG, que lembra que foi o ditador Francisco Franco quen nomeou a Xoán Carlos I como sucesor "a título de Rei", reafirmou o seu compromiso democrático e republicano.