A presidenta do Banco Central Europeo (BCE), Christine Lagarde, destacou que a recuperación da economía da zona euro comezou a cobrar impulso nos últimos meses a medida que se retiraron as restricións para conter a pandemia de coronavirus, aínda que advertiu de que este rebote aínda é moi incipiente e daquela instou aos líderes políticos a que cheguen con rapidez a un acordo ambicioso sobre o plan de apoio á recuperación da rexión. "É importante que os líderes europeos acorden rapidamente un paquete ambicioso", sinalou a banqueira central na conferencia de prensa posterior á reunión do Consello de Goberno do BCE, que mantivo sen cambios os tipos de xuro e mais o resto das súas medidas para facer fronte ao impacto económico da pandemia.

Os xefes de Estado e de Goberno da Unión Europea manterán este venres e sábado o seu primeiro cumio presencial en Bruxelas desde o brote de coronavirus, que estará marcado polas medidas de seguridade para evitar contaxios, pois estarán obrigados a levar máscara cando non sexa posible respectaren a distancia de seguridade, non se permitirá a entrada da prensa ao edificio do Consello Europeo e estará presente no edificio un equipo médico por se algún presenta síntomas.

Os Vintesete tentarán alcanzar un acordo sobre o orzamento da UE a longo prazo e o fondo de recuperación económica aínda que as discrepancias entre as capitais seguen existindo e non é descartable que sexa necesario un novo cumio os días seguintes para desbloquear a situación. Pero a urxencia ocasionada pola pandemia forzou a convocar esta reunión de maneira presencial, co obxectivo de incentivar o debate entre os xefes de Estado e achegar así a posibilidade dun acordo.

Con todo, a cita estará marcada polas medidas de seguridade. Segundo explicaron fontes comunitarias, tentarase respectar a distancia física en todo momento e haberá un sistema de circulación e renovación do aire. Os líderes da UE deberán levar máscara ao entrar ao edificio e sempre que non sexa posible respectar o metro e medio de distancia entre eles no seu interior.

Os primeiros ministros e presidentes do Goberno dos Vintesete poderán facer declaracións a un equipo audiovisual formado por catro fotógrafos e un operador de cámara, pero non haberá preguntas de ningún xornalista, que ademais non poderán acudir ao edificio do Consello para cubrir a reunión, como é o caso habitualmente. O resto do persoal que estará presente no edificio, como equipos audiovisuais, axentes de seguridade ou asistentes, terá que levar a máscara posta en todo momento.