EFE

O consello de administración do Adif autorizou a adxudicación do contrato de obras de execución do proxecto construtivo de renovación de vía do tramo Monforte de Lemos-Lugo por un importe de 30,3 millóns de euros.

Os traballos, adxudicados á empresa Comsa, enmárcanse nas actuacións promovidas polo administrador de infraestruturas ferroviarias para a mellora da calidade, competitividade e fiabilidade da conexión entre as dúas cidades lucenses de maior tamaño.

O traxecto Monforte-Lugo ten actualmente 71 quilómetros de lonxitude en vía única non electrificada. Precisamente, a electrificación deste tramo constitúe un dos principais investimentos planificados para este corredor ferroviario. O contrato inclúe a substitución de valados, travesas, carril, desvíos e pasos sobre vía para tráfico rodado e peonil en todo o traxecto. A actuación conta con financiamento europeo a través dos fondos NextGenerationEU.