Dous de cada tres autónomos aínda non recuperaron o nivel de facturación precovid, e deles a metade non descarta ter que pechar o seu negocio. O 25 % dos autónomos prevé que non recuperará a normalidade ata dentro de dous anos. Superado o impacto das restricións sanitarias, o barómetro de setembro de ATA destaca os dous principais problemas aos que se enfrontan neste momento os traballadores por conta propia.

Lorenzo Amor, presidente de ATA: "O 30 por cento dos autónomos sinala a suba de impostos, e un de cada catro sinala a suba da luz como o principal problema para o seu negocio".

Os autónomos suspenden a xestión das axudas directas, o paquete de 7.000 millóns de euros aprobado polo Goberno. Critican a burocracia e as condicións para recibilas, polo que só as solicitou un de cada dez.

Rafael Granados, presidente de ATA Galicia: "Lévase gastado o 33 % do presuposto para Galicia, debido á rixidez do real decreto do Goberno nos requisitos para as axudas directas".

Canto ao salario mínimo, o 75 por cento dos autónomos enquisados cren que non é o momento de subilo.