A partir do 11 de maio hai cambios na circulación nas vías urbanas. Modifícanse os límites de velocidade en función do tipo de rúa, nalgunhas redúcese ata os 20 quilómetros por hora. 

Esta redución obedece a un dato contundente en que se basea un estudo realizado pola Dirección Xeral de Tráfico.

"A 50 quilómetros por hora, en caso de atropelo, falece o 90 %. A 30 por hora falece o 10 %", asegura Pere Navarro, director da Dirección Xeral de Tráfico.

Por esta razón, 30 quilómetros por hora será a velocidade máxima nas vías urbanas que só teñan un carril por sentido de circulación. A velocidade será menor nas vías onde a calzada e a beirarrúa estean ao mesmo nivel. Aquí só se poderá circular como máximo a 20 quilómetros por hora.

O obxectivo é mellorar a seguridade dos viandantes no ámbito urbano onde, segundo os datos da Dirección Xeral de Tráfico, a sinistralidade aumentou nos últimos anos.

As administracións locais terán que adaptar a sinalización á nova lei, que comezará a aplicarse o próximo 11 de maio en todas as cidades de España.