Cada vez hai máis conciencia da necesidade de utilizar protectores solares para pel.

Este ano, ademais, hai novidades, segundo lembran os farmacéuticos na súa campaña de fotoprotección. A pel non está igual tras o confinamento.

Marga Muñoz de la Llave, vicepresidenta do Colexio Oficial de Farmacéuticos da Coruña: "A pel non xerou a melanina natural porque non saímos á rúa. Iso complica á hora de tomar o sol, porque temos a pel máis sensible. É máis doado que nos queimemos".

E, por iso, é fundamenal botar o fotoprotector antes de saír da casa e renovar cada dúas ou tres horas. E hai máis consellos novos.

"Outra novidade é o uso de máscaras. Isto fai que pensemos que estamos protexidos. Pero, dependendo da composición das máscaras, podemos estar máis ou menos. É importante poñer protección solar en toda a cara, incluída a parte que cobre a máscara", engade Muñoz.

Cómpre lembrar as recomendacións de sempre: utilizar o fotoprotector axeitado todos os días, soleados ou non, e para calquera actividade, e evitar a exposición entre o mediodía e as catro da tarde.