A planta viguesa do grupo Stellantis realiza novas paradas de produción durante este mércores e este xoves por problemas de subministración. A dirección da fábrica transmitíullelo aos traballadores na que explicou que esta medida adoptarase como consecuencia "da falta de aprovisionamentos".

Suspéndese  a actividade da quenda de noite nos dous sistemas de montaxe durante este mércores. A parada de produción afectará as quendas A e B do Sistema 1 este xoves. Para afrontar este escenario, a planta de Balaídos ten en marcha un ERTE pactado coa maioría do comité de empresa que contempla a regulación dos traballadores fixos a tempo completo durante un máximo de 60 días, e que está en vigor ata final de ano.