CRTVG

Buscar

Dirección e sindicatos de Navantia acordan un ERE para 1.706 empregados en España

Publicado o 05/04/2019 08:09

En Ferrol está previsto que se prexubilen este ano 636 traballadores

Navantia acaba de asinar o expediente de regulación de emprego que suporá o despedimento de 1.700 traballadores dos sete centros de traballo da compañía. O ERE afectará todos os operarios que teñan 61 anos ao remate de 2020. O acordo foi ratificado por unanimidade pola dirección do estaleiro público e os representantes dos traballadores.

Segundo o documento, para aplicar estas saídas quedaron acreditadas "causas económicas, organizativas e de produción, que fan necesario subscribir o presente acordo, e que se concretan en perdas recorrentes e un persoal non axustado ás necesidades do negocio". O acordo entre a dirección da empresa pertencente á Sociedade Estatal de Participacións Industriais e os sindicatos sinala que o 30 de abril deste ano 2019 "causarán baixa na empresa todas aquelas persoas que teñan feitos os 61 anos ou máis neste data", mentres que a finais de cada mes, ata o 31 de decembro de 2020, "iranse incorporando progresivamente ao expediente quen faga esa idade".

Por outra banda, un grupo menor de operarios, que non chega ao centenar, concretamente 97, verá atrasada a súa saída nun prazo máximo de seis meses, por "consideralos imprescindibles para levar adiante e terminar traballos e proxectos en curso", reflicte o documento.

Este ERE colectivo afecta traballadores de todos os centros de traballo, repartidos nos tres estaleiros da baía de Cádiz, os dous da ría de Ferrol, o de Cartaxena (Murcia) e os servizos centrais de Madrid. Ademais, segundo este acordo, garántense as cantidades económicas a percibir polos operarios, con complementos achegados pola empresa ata a chegada á idade da xubilación, constituíndose, ademais, entre as partes asinantes deste acordo unha comisión de seguimento. Estes operarios dispoñen de beneficios sociais cos que contan tamén os traballadores en activo.

 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

05/04/2019