CRTVG

Buscar

Morre un home e a súa nai queda ferida tras arder a súa casa en Santander

Publicado o 22/11/2019 12:07
Morre un home e a súa nai queda ferida tras arder a súa casa en Santander

Un home de 66 anos faleceu e a súa nai, de 93, quedou ferida nun incendio que se declarou esta madrugada nunha vivenda da avenida Cardeal Herrera Oria de Santander, no barrio de Cazoña.

Segundo informou a Policía Nacional, o home xa falecera cando os bombeiros accederon á vivenda e a nai foi trasladada de urxencia ao hospital Valdecilla en estado grave.

Dúas dotacións dos bombeiros de Santander e unha autoescada acudiron á vivenda, situada no número 43 da Cardeal Herrera, arredor das 3.30 horas, e tamén foron mobilizados a Policía Nacional, a Local e o 061.

Cando chegaron saía unha gran cantidade de fume das xanelas da cociña e dun dos cuartos da casa. Os bombeiros forzaron a porta principal, entraron na vivenda e sacaron os dous ocupantes.

Polo momento descoñécense as causas do incendio, aínda que si se sabe que tivo a súa orixe no dormitorio da muller.

Ás 5.00 fíxose o levantamento do cadáver do seu fillo, que foi trasladado ao Instituto Anatómico Forense, e esta mañá acudiron á vivenda efectivos da Policía Nacional para inspeccionala.