CRTVG

Buscar

Milleiros de cidadáns piden en Santiago a paralización de nova lei de saúde

Publicado o 04/02/2018 21:50

Milleiros de persoas manifestáronse en Santiago esta mañá para esixir unha sanidade pública sen recortes nos orzamentos, nas camas hospitalarias nin no persoal sanitario. Reclamaron que se paralice a reforma sanitaria e que o goberno galego cumpra co dereito cidadán a unha sanidade de calidade, con hospitais comarcais e investigación pública.

Chegados desde a Mariña, Monforte, o Salnés, Vigo e outros lugares do país milleiros de persoas, de todas as idades, esixíronlle ao goberno que free a actual política sanitaria e a lei na que se ampara."Entendemos que esta lei o que pretende é manter e consolidar lexislativamente os cambio que tivo o sistema nos últimos anos: a descapitalización dos hospitais comarcais, a privatización da Investigación e a precariedade da atención primaria", criticaba o portavoz da Plataforma SOS Sanidade Pública.

Á fronte da manifestación, unidade política de toda a oposición e tamén sindical. Rexeitan o proxecto de modificar a Lei Galega de Saúde que se discutirá no Parlamento esta semana e convocan ao presidente da Xunta a unha negociación con todos os axentes implicados. 

"A posición de En Marea, xunto coas maiorías sociais e da poboación de Galiza é a de rexeitar frontalmente esta reforma sanitaria. Non queremos máis recortes, máis desviacións á privada, non queremos supresión de áreas sanitarias. Queremos sanidade pública e querémola cerca da xente" asegurou Luís Villares.

"Das catro provincias, de todas as bisbarras, da cidade e do rural, Galicia está hoxe contra as políticas sanitarias de Feijoo. E Feijoo ten que tomar nota. O goberno conservador ten que recibir a mensaxe da cidadanía para corrixir os seus erros", advertiu o secretario xeral do PSdeG, Gonzalo Caballero.

"O goberno do PP non pode usar a maioría absoluta que lle deron os cidadáns en contra das persoas deste país. E moito menos converter a enfermidade nun negocio para uns poucos, que é o que está a facer Núñez Feijoo. Insistiu a portavoz nacional do BNG, Ana Pontón.

A mobilización rematou cunha praza da Quintana ateigada de manifestantes que esixiron que os dereitos sanitarios deben ser antepostos aos intereses de empresas privadas que negocian coa saúde.

Noticias web

04/02/2018