Grecia segue rexistrando hoxe na península do Peloponeso o maior incendio da tempada, polo que xa tiveron que ser evacuadas dos seus fogares unhas 4.000 persoas así como 800 nenos dun campamento de verán. O incendio forestal comezou preto dun campamento militar en Céncreas a tarde do mércores e ata o de agora avanzou con rapidez debido aos fortes ventos que sopran na zona cara ao sueste e que van destruíndo ao seu paso bosques de piñeiro, casas, campos agrícolas, instalacións gandeiras e mesmo un camión de bombeiros do que os seus ocupantes puideron escapar.

De momento non se produciron vítimas mortais, aínda que si hai perdas materiais cuxa extensión aínda non está clara. Este grave incendio coincide co segundo aniversario do máis mortífero do país, en Mati e outras localidades costeiras próximas a Atenas, onde pereceron 102 persoas. 

Uns 268 bombeiros, 54 camións cisterna, 5 helicópteros e 8 avións forman parte dos labores de extinción. Esta mesma mañá estalaron outros dous incendios que despois foron parcialmente controlados en Lutraki, a uns 10 quilómetros da zona onde se orixinou este grave incendio. En declaracións a CNN Grecia, o tenente xeneral Stefanos Kolokuris explicou que a situación vai mellorando, aínda que non puideron percorrer toda a zona porque parte do terreo, ao ser un bosque case virxe, é inaccesible.