Non faltaba de nada. Catering e picadiscos para amenizar o serán aos dezaoito convidados e ata un cartel anunciando a festa, na porta. A Policía Local de Sant Josep de Sa Talaia, en Eivisa, alertaba dos feitos a Garda Civil na tarde do domingo e varias patrullas acudiron ata esta vila illada onde detiveron o organizador e identificaron e denunciaron todos os participantes.

Na localidade de Íscar, en Valladolid, dezaoito persoas decidiron continuar a festa despois dos aplausos das oito o pasado xoves e baixaron á rúa para bailar xuntos unha coreografía. A Garda Civil recibiu o vídeo da denuncia a través da aplicación Alertcops.

E na Coruña, a Policía Local denunciou onte a cinco persoas que facían unha merenda no parque dos Mariñeiros. Na primeira xornada en que se permitiu a saída á rúa dos nenos, sancionaron só nesa cidade 34 persoas. En Galicia van xa 190 detidos e 28.790 propostas de sanción desde o inicio do estado de alarma por infrinxir as medidas restritivas do confinamento.