A desestacionalización turística ten, no mes de novembro, un dos seus obxectivos. Pasada a tempada alta do verán e en vésperas do período de Nadal, empresas e institucións afánanse en promocionar as vantaxes de viaxar nesa época do ano. E o certo é que os datos son cada vez mellores. En novembro pasado, máis de catro millóns e medio de turistas estranxeiros visitaron España, e realizaron un gasto total de 4.890 millóns de euros, é dicir, 155 euros por persoa e día.

España é destino predilecto sobre todo para turistas europeos, co Reino Unido, Alemaña e Francia como principais países emisores. E, dentro de España, as Canarias, Cataluña e Andalucía son as zonas que máis visitantes estranxeiros recibiron en novembro. En Galicia, a demanda estranxeira en establecementos hoteleiros incrementouse nun 26 por cento.

Nava Castro, directora de Turismo de Galicia: "Esperamos que sexa o segundo mellor ano en cantidade pero en gasto e estadía este xa é o mellor ano".

Ata novembro, visitaron España 78 millóns e medio de turistas estranxeiros, que realizaron un desembolso de case 85.000 millóns de euros.